Stè mia cupà i ragn!

A gh’è gnint da fa, a i èsar ümàn i ragn ig piàș mia tant. A gh’è indritüra na cundisiún psiculògica ciamada “aracnufubia”, paròla c’aș dröʋa par li parsuni c’an pöl gnanca supurtaran la ʋẹsta e ch’i g’ha dli reasiún estremi. Anca sensa riʋà acsẹ́ luntàn, l’è ʋera che in generàl i fo schif a’n bèl pò’d gent.

A mẹ no. S’i è mia tròp gròs a i a tög anca in man sensa prublèmi e a gh’è anca di tipu’d ragn c’am fo rẹdar, acmẹ́’l ragn balerín, col c’al g’ha li sanfi lunghi e sütili e c’al camina c’al par imbariàc. L’è anca ʋera, però, che coi gròs e plus i’m fo saltà indré anca a mẹ.

Al ragn balerín, in inglés "daddy long-legs" (paparín gambi lunghi)

Epőr töti harí santű di ch’i ragn i pòrta furtüna. Aș diș mia sul a Süșèra, l’è na ròba cumüna a tanti tradisiún. In italiàn aș dis che “il ragno porta guadagno” e a gh’è indritüra la legenda che, quand l’è na Gesù, di ragn i ha fat sö na tlarina par tẹgnar calda la capana. Am admandi d’indua ʋe tanti pruʋèrbi acsẹ́ e parché tanta gent a copa i ragn listés: a g’hai ʋòia’d cupà la furtüna?

Ho sircà insema internet, ma ho catà pòc. Epőr na spegasiún lògica la g’ha da èsag. L’őnica c’ho catà föra l’è che i ragn i magna i insèt e l’è mèi mia cupai s’an vrom mia èsar invàs da moschi e sansali. As pöl da che la tradisiún pupular la vrẹs insgnà a cuntrulà l’istínt ad cupai e inveci a prutèșar n’animàl c’l’è ben ötil.

Dunca, scultèm, stè mia cupà i ragn, eh? Al men i ragn süșarés, ch’i è mia velenús.